Njohësit e çështjeve politike thonë se mosbashkëpunimi ndër institucional mes Kosovës dhe Luginës së Preshevës po e pengon themelimin e Asociacionit të komunave me shumicë shqiptare në Serbi.
Sipas tyre shqiptarët e Luginës nuk e kanë përkrahjen e Qeverisë siç e kanë serbët e Kosovës atë të Serbisë. Kritika kanë edhe për institucionet e Kosovës, që sipas tyre kjo kërkesë është dashur të bëhet që nga fillimi i dialogut.
Asociacioni i komunave me shumicë shqiptare në Serbi, zor se mund të bëhet.
Sidomos pas mos bashkëpunimit mes spektrit politik të Kosovës e Luginës së Preshevës.
Kështu thotë profesori universitar për politikë, Milazim Krasniqi, derisa sipas tij, atje më shumë luftohet për mbijetesë se sa për ta zhvilluar autonominë.
Ndryshe e vlerëson njohësi i çështjeve politike, Fidan Ukaj. I njëjti thotë se institucionet e Kosovës është dashur më herët ta kërkojnë një Asociacion për Preshevën, raporton gazeta10.
Ukaj kritikon moskomunikimin ndërinstitucional, derisa thotë se kërkesa është dashur të vijë nga politikanët e Preshevës.
Para takimit të kryeministrit Kurti dhe presidentit Vuçiq në Ohër, disa prej përfaqësuesve të Luginës së Preshevës i kanë dorëzuar BE-së një kërkesë për përfshirjen e tyre në zbatimin e propozimit evropian ndërmjet Kosovës dhe Serbisë.
Në planin evropian që përbëhet nga 11 pika, në asnjërën prej tyre nuk përfshihen shqiptarët e Preshevës, Bujanocit e Medvegjës.
Futja e çështjes së shqiptarëve të Luginës në dialogun ndërmjet Kosovës dhe Serbisë ka qenë kërkesë e kamotshme e tyre, por që asnjëherë nuk ishte marrë parasysh.
