Ish Kryeparlamentari i Kosovës, Kadri Veseli, është deklaruar sërish i pafajshëm, në seancën që sot ka hapur fillimin e procesit gjyqësor kundër katër krerëve të UÇK-së në Hagë.
I pyetur nëse e konfirmon deklarimin e tij të parë si i pafajshëm, Veseli ka thënë “Po, tërësisht i pafajshëm”. Veseli, po ashtu, ka shprehur pakënaqësinë e tij për vonesën e fillimit të procesit gjyqësor prej dy vjetësh e gjysmë.
Dy vjet e gjysmë pas mbajtjes në paraburgim të katër krerëve të UÇK-së, Hashim Thaçit, Kadri Veselit, Rexhep Selimit dhe Jakup Krasniqit, në Hagë sot ka nisur procesi gjyqësor kundër tyre. Ata akuzohen për krime lufte, duke i cilësuar si një “Ndërmarrje Kriminale e Përbashkët”. Ky term, siç konsiderohet gjerësisht, përfshin gjithë Ushtrinë Çlirimtare të Kosovës, e cila në vitet 1998-1999 zhvilloi luftën e saj për liri nga Serbia.
Pika 35 e aktakuzës i portretizon si anëtarë të Ndërmarrjes Kriminale të Përbashkët pothuajse të gjithë udhëheqësit politikë dhe ushtarakë të UÇK-së – nga Shtabi i Përgjithshëm, Komandantët dhe Zëvendëskomandantët e Zonave, të Brigadave, të Njësiteve, e deri te ushtarët më të thjeshtë dhe të tjerë që vepronin në emër të UÇK-së.
Për dy vjet e gjysmë të punës së saj, Gjykata Speciale është kritikuar për vonesën e fillimit të gjykimit, për zvarritje procedurale, për tentim të shmangies nga baza juridike e funksionimit të saj, për fshehje të provave shfajësuese, për redaktime të shumta, si dhe për bashkëpunim me shtetin serb – nga i cili ka pranuar mijëra dosje./PrishtinaPress/
