Një burrë që qëlloi për vdekje shtatë persona në Gjermani, u vizitua nga policia muajin e kaluar pasi një informacion ngriti shqetësime për shëndetin e tij mendor, raporton BBC.
Ai bashkëpunoi me oficerët dhe nuk kishte arsye të mjaftueshme në atë kohë për t’ia marrë armën, tha policia.
I dyshuari 35-vjeçar, i quajtur vetëm Philipp F, kishte patentë për posedimin e armës për qëllime sportive.
Gjermania po përgatit një ligj të ri që përfshin kufizime më të forta mbi zotërimin e armëve, tha ministri i brendshëm.
Shtatë persona, duke përfshirë një foshnjë të palindur, u vranë në sulmin e së enjtes që u shpalos në një sallë mbledhjesh të Dëshmitarëve të Jehovait në qytet.
Thirrja e parë e urgjencës erdhi në orën 21:04 për të raportuar se kishte të shtëna dhe oficerët ishin në vendngjarje katër minuta më vonë.
Në video u duk se personi i armatosur qëllonte përmes një dritareje. Më pas ai sulmoi ndërtesën ku ishin mbledhur dhjetëra njerëz, duke gjuajtur nëntë karikatorë municionesh përpara se të kthente armën mbi veten pasi mbërriti policia.
Tetë persona u plagosën, duke përfshirë një grua që ishte shtatëmuajshe shtatzënë. Ajo mbijetoi por foshnja e saj e palindur u vra.
Kancelari Olaf Scholz tha se numri i të vdekurve mund të rritet.
