Kontejnerët nëntokësorë në Prishtinë, në të cilët janë investuar 200 mijë euro nga buxheti komunal, ka shumë kohë që nuk janë funksionalë, shkaku i dështimit të mirëmbajtjes së tyre.
Vendosja e këtyre kontejnerëve është bërë, më 2013, si projekt që do të bënte që mbeturinat të mos dukeshin në sipërfaqe, pasi që ato do të futeshin nën tokë sapo të hidheshin, e pastaj zbrazja e tyre do të bëhej po ashtu në mënyrë të veçantë, shkruan sot “Koha Ditore”.
Mungesën e mirëmbajtjes së tyre e konfirmojnë drejtues të Komunës së Prishtinës, por edhe ata të kompanisë “Pastrimi”, e cila ka qenë kompetente për mirëmbajtjen e tyre. Por, tashti të dyja palët japin arsye të ndryshme, se përse ka dështuar mirëmbajtja e këtyre kontejnerëve.
