Deputeti i Vetëvendosjes, Enver Dugolli ka thënë se formimi i Asociacionit njëetnik do të thotë luftë pas pak vitesh.
Duke folur për T7, Dugolli ka sugjeruar se në rast të krijimit të një asociacioni në Kosovë, mund të ngjajë sikur në Bosnjë e Hercegovinë.
“Formimi i një asociacioni njëetnik nënkupton përgatitjen e një lufte pas pak vitesh. Sikur që ka ndodhur në Bosnje e Hercegovinë. Pas formimit të asociacionit ka filluar lufta atje”, ka thënë Dugolli.
“Është i njëjti skenar, është e njëjta metodologji e punës e Serbisë që tenton t’i instrumentalizojë serbët lokalë që të bëjë pengesa në avancimin e një shoqërie demokratike”, ka deklaruar ai.
Lëvizja Vetëvendosje, e cila aktualisht e mban pushtetin, është duke e kundërshtuar ashpër insistimin ndërkombëtar për themelimin e Asociacionit për komunat serbe.
Drafti i Asociacionit është publikuar sot nga organizata Friedrich-Ebert-Stiftung, ndërkaq ambasada amerikane do ta mbajë nesër, 31 janar, një takim me institucione, opozitarë e përfaqësues të organizata të shoqërisë civile për këtë çështje. /GazetaExpress
