Kryeministri Albin Kurti e ka pritur në takim lamtumirës ambasadorin e Turqisë në Kosovë, Çagri Sakar.
Kurti e ka falënderuar ambasadorin turk për angazhimin në thellimin dhe zgjerimin e marrëdhënieve ndërmjet dy shteteve.
“Kryeministri i Republikës së Kosovës, Albin Kurti, së bashku me Zëvendësministrin e Punëve të Jashtme të Kosovës, Kreshnik Ahmeti, priti në takim lamtumirës ambasadorin e Turqisë në Kosovë, Çagri Sakar. Në këtë takim të fundit gjatë mandatit të tij, Kryeministri Kurti e falënderoi ambasadorin Sakar për bashkëpunimin në Kosovë. Ai vlerësoi angazhimin e tij për thellimin dhe zgjerimin e marrëdhënieve bilaterale ndërmjet Kosovës dhe Turqisë, si dhe për projektet e përbashkëta në fusha të ndryshme”, ka njoftuar Zyra e Kryeministrit.
Në takim u tha se “lidhjet ndërmjet dy vendeve janë të thella, prandaj mbi këtë bazë ka angazhim për avancim të mëtejmë të bashkëpunimit të ngushtë”, sipas ZKM-së.
Në qershor të vitit të kaluar, kryediplomati turk, Mevlut Cavusoglu ishte në Kosovë dhe ishte takuar me kryeministrin e Kosovës, Albin Kurti.
