Ka nisur në Vlorë ceremonia e ngritjes së flamurit me rastin e 110-vjetorit të Pavarësisë.
Në ceremoninë festive për ngritjen e flamurit mori pjesë kryeministri Edi Rama, kryeministri i Kosovës Albin Kurti, presidenti i Shqipërisë Bajram Begaj dhe presidentja e Kosovës Vjosa Osmani.
28 Nëntori njihet ndryshe edhe si Dita e Flamurit, një ditë e rëndësishme për shqiptarët në trevat shqiptare dhe anembanë botës.
Më 28 Nëntor 1912, Ismail Qemali ngriti flamurin në Vlorë duke shpallur Shqipërinë shtet sovran dhe të pavarur.
Me aktin e Shpalljes së Pavarësisë së Shqipërisë, Kryetari i Qeverisë së Përkohshme, Ismail Qemali njoftoi gjashtë Fuqitë e Mëdha: Anglinë, Italinë, Austro-Hungarinë, Francën, Gjermaninë dhe Rusinë.
Po ashtu, u njoftuan edhe shtetet ballkanike: Rumania, Mali i Zi, Serbia, Bullgaria, Greqia e Turqia, duke u kërkuar njohjen e pavarësisë, si rrjedhojë e natyrshme e vullnetit të popullit shqiptar./Prishtinapress/
