Në Bruksel është duke u zhvilluar takimi i përbashkët ndërmjet kryediplomatit evropian, Josep Borrell, me kryeministrin e Kosovës, Albin Kurti, dhe presidentin e Serbisë, Aleksandar Vuçiq, shkruan Prishtinapress.
Ky takim ka filluar rreth orës 10:00, po mbahet me ftesë të kryediplomatit evropian, Josep Borrell.
Ndërsa, fillimisht Borrell ka mbajtur takime ndaras me kryeministrin Kurti dhe presidentin Vuçiq.
Deputeti i Lëvizjes Vetëvendosje, Visar Korenica , ka bërë me dije se vendimet që janë të dakorduara me ndërkombëtarët janë në të mirë të Kosovës.
Në një prononcim dhënë portalit Prishtinapress, Korenica tha se edhe vendimi për shtyrje të targave me afat shtesë 24 orë është i njohur për aleatët.
“Çdo veprim e vendim që ka dhe dakordësinë e bashkësisë ndërkombëtare është në të mirë të Kosovës, dhe çdo vendim i kryeministrit besoj se është në këtë frymë. Edhe shtyerja edhe vendimi për afat shtesë 24h janë të njohura për aleatët tanë” tha Korenica për Prishtinapress.
Kujtojmë se fillimisht, Borrell ka mbajtur takime ndaras me kryeministrin Kurti dhe presidentin Vuçiq.
Ndërsa, Borrell tha mbrëmë se e ka thirrur këtë “takim urgjent”, për shkak të nevojës për shtensjonuar situatën
Qeveria e Kosovës ka nisur të zbatojë planin e saj nga 1 nëntori.
Faza e parë përfshinte qortimin e shoferëve, e dyta shqiptimin e gjobës prej 150 eurosh për ata shoferë, dhe e treta targat provuese.
Zbatimi i këtij plani është paraparë të përfundojë më 21 prill dhe nga ajo datë, parashihet që në komunikacion të lejohen vetëm makina me targa të ligjshme, RKS.
Kurti dhe Vuçiq janë takuar sot në Bruksel pas më shumë se tre muajsh. Edhe pse atëherë ishte thënë se pritet të ketë një dinamikë të re në dialog dhe takime të nivelit të lartë së paku një herë në muaj, liderët e dy vendeve nuk janë takuar në kuadër të këtij procesi që nga muaji gusht./Prishtinapress/
