Në emisionin “Drejtësia në Kosovë” u transmetua pjesa e dytë e hulumtimit për negociatat e blerjes së një vendimi gjyqësor në gjykatën e Deçanit.
Prokuroria në Pejë e ndërmori këtë aksion më 13 janar një ditë pasi u publikua promo e pjesës së parë të hulumtimit për mito në emër të gjykatëses Safete Tolaj, nga i biri i saj Fisniku.
Prokuroria e shtetit kishte urdhëruar që të kryhet bastisje në shtëpinë e gjyqtares së Gjykatës së Deçanit, Safete Tolajt.
Fisnik Tolaj ishte në shtëpi gjatë bastisjes së policisë, e kur u pyet nga këta të fundit se a kishte diçka të jashtëligjshme në shtëpi ai u përgjigj me “Jo”.
Policia gjeti mjaftueshëm prova për të arrestuar Safete e Fisnik Tolajn, si 60 kopje dokumente me vulë dhe nënshkrim të gjykatës komunale për kundërvajtje në Deçan, 50 ekzemplarë të pastra të vulosura me vulë të Gjykatës Themelore të Deçanit dhe disa aktvendime të lëshuara nga Safete Tolaj.
Safete Tolaj dhe djali i saj Fisnik Tolaj u arrestuan dhe u dërguan në stacionin policor.
https://youtu.be/4U8VWNZUOCM
Berat Kelmendi, i cili priste nga djali i gjyqtares së Gjykatës së Deçanit, Safete Tolaj, ta mbyllte një lëndë për të cilën kishin bërë marrëveshje tha se lënda nuk është kryer.
Ai tha se i kishte treguar Fisnik Tolajt, djalit të gjykatëses se e kishte xhiruar atë duke bërë pazare për rastin..
“Nuk është kryer puna, I kam thanë që t’kam incizu, ka thanë s’ka dert se nuk tutna prej kërkujt se e kam nanën gjyqtare. E kam pritë që pe kryn e nuk e ka kry”, tha Kelmendi.
Ai tregoi se pas takimit me nënën e Fisnik Tolajt, kjo e fundit kishte biseduar me djalin e saj dhe kishin rënë dakord për t’ia kthyer Berat Kelmendit shumën e parave të cilën Fisniku ia kishte marrë.
Në linkun e mëposhtëm mund të shikoni edhe pamjet të cilat iu shfaqën nënës së Fisnik Tolajt.
Ajo aktualisht është në arrest shtëpiak për shkak të këtij rasti pasi që qe shoqëruar në polici në ditën e transmetimit të pjesës së parë të emisionit “Drejtësia në Kosovë”.
Kryetarja e Gjykatës në Deçan, Safete Tolaj, pas filmimeve të shfaqura nga “Drejtësia në Kosovë”, ku shihet se si djali i saj kërkon para për të mbyllur një lëndë për të cilën Tolaj e kishte në dorë, tha se për lëndën ka vendosur sipas bindjeve të saja dhe se nuk ishte në dijeni për ato se çfarë djali i saj bënte në emër të saj.
Kjo asnjë minutë nuk don lëshim. Absolutisht s’kam ditë… Unë e kam vendos lëndën sipas bindjeve ligjore. Në mënyrë absolute, pse janë ba këto të zeza”, ka thënë Tolaj.
Ajo e pranoi se ky rast e dëmton kredibilitetin e saj si gjykatëse.
