Kampi Bondsteel i KFOR-it amerikan është lidhur sot me sistemin e rrjetit elektrik të Kosovës.
Lajmin e ka bërë të ditur ministri Mbrojtjes, Armend Mehaj.
Mehaj tha se në ceremoninë e lidhjes së rrjetit elektrik morën pjesë kryeministri Albin Kurti, ministri Xhelal Sveçla, ambasadori Jeffrey Hovenier, si dhe shumë personalitete të tjera.
“Kjo ngjarje e rëndësishme do të ndihmojë në përgatitjen e Kampit Bondsteel për të ardhmen duke reduktuar në masë të madhe përdorimin e gjeneratorëve ndotës me naftë” shkroi Mehaj.
Në ceremoni morën pjesë edhe koloneli Matt DiNenna si dhe gjeneralmajori James Smith.
“Prania e fuqishme e Qeverisë është dëshmi e përkushtimit të thellë të Kosovës ndaj partnerëve tanë të NATO-s dhe ndaj aleatit tonë kryesor, Shteteve të Bashkuara të Amerikës” shtoi ministri./Prishtinapress/
