Kryetari i Aleancës për Ardhmërinë e Kosovës, Ramush Haradinaj, e ka takuar sot kryetarin e Sindikatës së Bashkuar e Arsimit, Shkencës dhe Kulturës, Rrahman Jasharajn.
Haradinaj publikoi një fotografi me Jasharajn në Facebook, duke shkruar se për situatën e krijuar ka vetëm një zgjidhje.
“Bisedë e sinqertë me kryetarin e SBASHK z. Rrahman Jasharaj. Ka vetëm një zgjidhje: rritja e pagave”, shkroi Haradinaj.
Ai thotë se Qeveria duhet ta procedojë shpejt Ligjin e Pagave, ndërsa tha se AAK-ja i mbështet kërkesat e sindikatave.
“Qeveria të procedojë sa më parë Ligjin e Pagave. Aleanca për Ardhmërinë e Kosovës mbështet kërkesat e drejta të sindikatave në mbarë vendin”, thuhet në postim.
Punëtorët e arsimit vazhdojnë të jenë në grevë.
Kërkesa kryesore e sindikatave të këtyre punëtorëve drejtuar Qeverisë është ndarja e nga 100 eurove për punëtorët, derisa të hyjë në fuqi Ligji për Pagat. Këto kërkesa, kryeministri Albin Kurti i quajti iracionale të shtunën në një konferencë për media.
