Nga Zyra e Presidentes së Kosovës kanë thënë se Serbia e ka rritur aktivitetin ushtarak në kufirin me Kosovën. Një reagim të tillë e ka bërë shefi i stafit të presidentes Osmani, Blerim Vela.
Vela ka thënë se një gjë e tillë po ndodh, derisa presidenti i Serbisë po “lufton për paqe”.
Vela tutje ka shkruar se ministria serbe e mbrojtjes ka njoftuar se që nga 1 gushti kanë realizuar 4 vizita në objektet ushtarake në afërsi të Kosovës, për të kontrolluar siç kanë thënë “nivelin e gatishmërisë së tyre”.
Vela ka thënë se veprime të tilla janë armiqësore dhe janë në një linjë me synimet e Rusisë për destabilizim.
“Veprime të tilla armiqësore janë në përputhje me qëllimet e Rusisë për destabilizim”, ka shkruar Vela.
Ndryshe sot në veri të vendit janë stacionuar trupat amerikane të KFOR-it, të cilët kanë deklaruar se janë të gatshëm për ndërhyrje nëse shfaqet nevoja.
