Laura Berisha, motra e ish-zyrtarit të Doganës së Kosovës, Luan Berisha, ka kërkuar nga Kryeministri Albin Kurti që ta shkarkojë Ministrin e Brendshëm, Xhelal Sveçla.
Kjo kërkesë vjen përmes rrjeteve sociale, pasi që Sveçla të hënën ka deklaruar para Kurtit se bëhet fjalë për vetëvrasje.
“Albin Kurti, ju duhet ta shkarkoni Xhelal Sveçlën pas asaj që e tha sot publikisht, po e ceku edhe një herë që ende nuk kemi asnjë raport zyrtar nga prokuroria, ndrysa Xhelali e tha”, ka shkruar ajo.
Ndryshe, Laura Berisha, motra e ish-zyrtarit të Doganës së Kosovës, Luan Berisha, i cili u gjet pa shenja jete në oborr të Doganës në prill të këtij viti, “ua ka zënë rrugën” kryeministrit dhe ministrave të tij, derisa ata po ecnin në sheshin e Prishtinës, më përkrahje të kandidatit të tyre për kryeqytet, dhe ka kërkuar zbardhjen e këtij rasti.
Para kryeministrit Albin Kurti, ministrit të Brendshëm, Xhelal Sveçla, kryekuvendarit Glauk Konjufca, ministres së Drejtësisë, Albulena Haxhiu, ministres së Ekonomisë, Artane Rizvanolli, kandidatit të VV’së, për Prishtinën, Aben Vitia, e zyrtarëve tjerë të partisë që gjendeshin aty, ajo ka kërkuar të dijë nëse po punohet për zbardhjen e këtij rasti, që ajo e quajti vrasje.
Laura u ankua se ministri Sveçla nuk e ka pritur në takim, as nuk i ka kthyer përgjigje, megjithëse ka kërkuar disa herë.
“Po ju pyes juve dhe zotëri Sveçlën, vëllai im Luan Berisha zyrtar i lartë në Doganë u vra në oborr të Doganës më 17 prill dhe nuk e kemi asnjë përgjigje deri tash. Kemi kërkuar takim, na keni injoruar dhe nuk kemi asgjë deri tash, dhe desha të ju pyes, a jeni duke e luftuar krimin siç na keni premtuar apo jo”, ka thënë ajo.
Ministri i Financave, Punës dhe Transfereve, Hekuran Murati, i tha se po kryhen hetime.
“Jemi duke e luftuar dhe organet e rendit janë duke u marrë me gjitha këto dhe merren”, tha Murati.
Ajo insistoi se nuk ka marrë asnjëherë përgjigje për rastin e vëllait të saj.
“Asnjëherë nuk kemi marrë përgjigje, asnjëherë, asnjëherë. Ju kemi votuar për me luftu krimin, vëllai im u vra më 17 prill në oborr të doganës dhe nuk kemi përgjigje që gjashtë muaj e gjysmë dhe na keni injoruar totalisht”, deklaroi ajo dhe u largua.
