Drejtori i CIA-s, William Burns është takuar me udhëheqësin talebanë Abdul Ghani Baradar në Kabul, sipas zyrtarëve të paidentifikuar amerikanë të cituar nga Washington Post dhe Associated Press.
Sipas mediave të huaja, përcjell Telegrafi, takimi erdhi në mes të evakuimeve të vazhdueshme në aeroportin e Kabulit, tha burimi i Associated Press.
Rreth 16,000 njerëz janë evakuuar nga Afganistani gjatë 24 orëve të fundit, sipas Pentagonit, pasi trupat amerikane po udhëheqin një përpjekje gjithnjë e më të dëshpëruar për të transportuar mijëra të tjerë përpara “vijës së kuqe” të talebanëve për forcat perëndimore që të largohen nga vendi.
Presidenti amerikan Joe Biden është nën presion në rritje për të zgjatur afatin e 31 gushtit për të tërhequr forcat amerikane, me Britaninë e Madhe që pritet të lobojë për këtë në një samit virtual të G7 të martën.
Ndërkohë, siç raportojnë mediat, përcjell Telegrafi, Bashkimi Evropian ka evakuuar të gjithë personelin e tij nga Afganistani, përveç disa zyrtarëve që ende punojnë në aeroportin e Kabulit, thotë një zëdhënës i Komisionit Evropian.
“I gjithë personeli që duhej evakuuar është evakuuar”, u tha ai gazetarëve në Bruksel, shkruan Al Jazeera. “Ne ende kemi një prani thelbësore në aeroport për të menaxhuar atë që duhet menaxhuar, por stafi i delegacionit të BE-së dhe familjet e tyre janë evakuuar të gjithë”.
Ndërkohë Programi Botëror i Ushqimit i Kombeve të Bashkuara (WFP) i ka bërë thirrje komunitetit ndërkombëtar të dhurojë 200 milionë dollarë ndihmë ushqimore për Afganistanin, në mënyrë që furnizimet thelbësore të mund të dërgohen në rajonet e largëta para dimrit. /Telegrafi/
