Pjesëtarët e Forcës së Sigurisë së Kosovës të cilët shkuan dje në Shqipëri për t’i dalë në ndihmë për shuarjen e zjarreve në regjionin e Kukësit, tashmë janë kthyer në Kosovë.
Gjenerallejtënant, Rrahman Rama, ka thënë se Pjesëtarët e FSK-së e kanë kryer me sukses misionin e tyre për shuarjen e zjarrit dhe dje në mesnatë ata janë kthyer në Kosovë.
“Pjesëtarët janë kthyer mbrëmë, tani janë në kazermë. Gjithçka ka shkuar në rregull. Autoritetet e Shqipërisë kanë deklaruar se ka përfunduar si operacion dhe diku kah mesnata janë kthyer”, tha Rama.
Për këtë ndihmë, Rama tha se ka marrë falënderime nga presidenti shqiptar, Ilir Meta, Ministri i Mbrojtjes e autoritetet lokale.
“Edhe Ministri i Mbrojtjes edhe autoritetet lokale të bashkësisë edhe president i Shqipërisë kanë lavdëruar punën profesionale të pjesëtarëve”, tha Rama.
Rama tha se FSK është e gatshme që përsëri të ju dal në ndihmë autoriteteve civile jo vetëm në Shqipëri por edhe në rajon.
“Në jemi gjithmonë të gatshëm për mbështetjen e autoriteteve civile por në të njëjtën kohë edhe në regjion që kanë nevojë në këto fatkeqësi”, tha Rama.
Derisa për gjendjen me zjarre në Kosovë, Rama tha se për momentin nuk ka asnjë ekip në teren edhe se gjendja është stabile.
“Për momentin nuk ka ndonjë kërkesë, dje kemi pas në Shtupeq. Për momentin nuk kemi në terren sepse situata është e mirë”, tha ai.
Kontingjenti i FSK-së u përbë nga tri skuadra të zjarrfikës dhe shpëtimit të Gardës Kombëtare si dhe një ekip i Kompanisë për Operacione me Civil.
Kryebashkiaku i Kukësit, Safet Gjici në një lidhje live për News24 tha dje se zjarri mbi tunelin e Kalimashit ishte neutralizuar kur kishin arritur forcat ushtarake dhe zjarrfikësit nga Kosova.
“Patjetër, erdhën në ndihmë vëllezërit tanë të Kosovës, por kur erdhën ishte neutralizuar zjarri”.
Ndërkohë, nga fotot e publikuara të pjestarëve të FSK kur kishin arritur tek tuneli i Kalimashit, shihet mbrapa që ende vatra ishte e përfshirë nga flakët.
