Kryeministri Edi Rama pas aktakuzës së Zyrës së Prokurorit të Specilizuar ndaj presidentit të Kosovës, Hashim Thaci dhe kryetarit të PDK-së, Kadri Veseli, nga foltorja e Kuvendit të Shqipërisë ka komentuar këtë aktakuzë.
Sipas Ramës, me këtë aktakuzë nuk u hodh baltë vetëm për këta të dy, por mbi të gjithë Kosovën.
“Një njoftim ku nuk është se hidhet një baltë thjesht mbi Thaçin apo Veselin e UÇK por mbi vetë Kosovën e shqiptarinë. Para përfytyroni dikë , në çdo cep të globit që jo nuk di detaje po nuk di asgjë për tragjedinë ndaj Kosovës, krijon perceptimin e një vendi mes Evropës ku falë krimeve ndaj njerëzimit është instaluar një regjim kriminal. Në atë tekst duket sikur lexon për atdheun e agresorëve, ai tekst indinjues që nuk është aktakuzë po preludë, mediatike, i një procesi që më pas vijon. Të gjithë mbetën të befasuar nga aktakuza. Drejtësia është drejtësi dhe nuk është drejtësia në vetvete dhe as kërkimi i saj nga një strukturë e miratuar me vullnetin e vetë Kosovës që ngre pikëpyetje të mëdha, por është lexim i tekstit të shpërndarë në mbarë botën për të lajmëruar një proces gjyqësor ndaj dy figurave historike të paqes në Kosovë. I ngjan një fletërrufeje të revolucionit kinez”, tha Rama.
Zyra e Prokurorit të Specializuar ka njoftuar se presidenti i Kosovës, Hashim Thaçi dhe dhe ish-kryetari i Kuvendit, Kadri Veseli janë dy të akuzuarit e parë që pritet të paraqiten në Gjykatën Speciale në Hagë.
Në njoftimin e kësaj zyre, thuhet se Thaçi dhe Veseli dyshohen për 100 vrasje.
“Më 24 prill 2020, Zyra e Prokurorit të Specializuar (ZPS) u paraqiti Dhomave të Specializuara të Kosovës (DHSK) një aktakuzë me dhjetë pika për shqyrtim prej Gjykatës, ku Hashim Thaçi, Kadri Veseli dhe të tjerë akuzohen për një sërë krimesh kundër njerëzimit dhe krimesh lufte ndër të cilat, vrasje e paligjshme, zhdukje e detyruar e personave, përndjekje dhe tortura. Në Aktakuzë pretendohet se Hashim Thaçi, Kadri Veseli dhe të dyshuar të tjerë janë penalisht përgjegjës për afërsisht 100 vrasje të paligjshme”, thuhet në njoftimin e Zyrës së Prokurorit të Specializuar.
