Pajaziti përjashton zgjedhjet e parakohshme

Shefi i Grupit parlamentar të Partisë Demokratike të Kosovës, Zenun Pajaziti, ka thënë se kauza politike e opozitës ka degraduar.
Në një intervistë dhënë gazetës “Epoka e re”, ai ka theksuar se qasja e opozitës është duke dëmtuar thellë interesat e vendit.
Pajaziti ka thënë se nuk sheh asnjë arsye që vendi të shkojë në zgjedhje të parakohshme.
Sipas tij, zgjedhjet do të mbahen vetëm në afatin e rregullt kushtetues katërvjeçar.
Pajaziti e ka komentuar edhe deklaratën e Albin Kurtit për luftë të mundshme me Malin e Zi.
Ai thotë se deklaratat e tilla e fusin Kosovën në një qorrsokak, i cili mund të sjellë pasoja afatgjata.
Pajaziti ka bërë me dije se PDK-ja është duke punuar për të gjetur një zgjidhje për demarkacionin me Malin e Zi.
Çfarëdo vendimi që do të dalë nga Kuvendi i Kosovës për demarkacionin do të jetë i respektuar për PDK-në, ka thënë Pajaziti.
Ai ka theksuar se dërgimi i demarkacionit në arbitrazh ndërkombëtar kërkon pëlqimin e të dyja vendeve dhe kjo duhet trajtuar me kujdes.