Trajneri i ri i Barcelonës, Quique Setien, tha se ishte shokuar, kur e kuptoi se gjigantët spanjoll po e kërkonin.
Ernesto Valverde u shkarkua nga Barca edhe pse është lider në La Liga dhe ka kaluar tutje në Ligën e Kampionëve.
Ish-trajneri i Real Betis tha se ishte i befasuar kur u kontaktua: “Jo, as në ëndrrat e mia më të çmendura nuk mund ta imagjinoja të isha këtu. Dje po u shëtisja afër lopëve në fshatin tim, tani jam këtu duke trajnuar lojtarët më të mirë në botë”.
Setien ka thënë se mezi nuk pret të punojë me lojtarët e Barcelonës dhe Lionel Messin.
61-vjeçari tha se ka 12 vjet që i shikon në TV lojtarët e Barcelonës duke dhuruar spektakël.
Setien do të kërkojë të zbatojë stilin e lojës “Barca” me një lojë sulmuese të shpejtë.
The #QuoteOfTheDay, by @QSetien. pic.twitter.com/1oLZeaSosF
— FC Barcelona (@FCBarcelona) January 14, 2020
Në klub janë të entuziazmuar nga ajo që spanjolli mund t’i sjellë klubit me insistimin e tij që futbolli të luhet në një mënyrë tërheqëse.
Ndeshja e parë e Setien në krye të Barcelonës do të jetë në shtëpi ndaj Granadas të dielën.
