Vetëvendosje njoftoi se Kosova është bërë pjesë e një programi të rëndësishëm të BE-së, duke pretenduar që do t’i sjellë vendit miliarda euro.
“4.2 miliardë euro përfiton Kosova nga programi i BE-së Tregu i Përbashkët”, thuhet në një njoftim të partisë që qeverisë me vendin.
Megjithatë, deputetja e LDK-së, Hykmete Bajrami ka thënë se kjo është vetëm propagandë e pavërtetë.
“Propaganda nuk kalon!”, ka shkruar ajo.
“Sa i përket 4.2 mld. eurove për të cilat po propagandon LVV, qe dy fakte: e para, ato nuk janë vetëm për Kosovën, dhe e dyta, më e rëndësishmja, Kosova edhe më herët ka qenë pjesë e programeve të BE-së – menjëherë pas nënshkrimit të MSA-së, të cilën VV nuk e ka votuar. MSA ka qenë parakusht që Kosova të bëhet pjesë e programeve të BE-së, por pushteti i sotëm në atë kohë as nuk i ka njoftë si në rastin e letrës së Mogherinit”, thuhet në reagimin e saj.
Sipas Bajramit, Programi i Tregut të Përbashkët (Single Market Programme) sot, është programi COSME dikur.
“Këtë program Kosova e ka dakordu me BE-në në vitin 2017. I njëjti është ratifiku në 2017 dhe ka hyrë në fuqi në 2018. Shihni linkun për Ligjin e Ratifikuar”, ka shkruar Bajrami duke ngjitur linkun e mëposhtëm.
