Qysh në tentimin e dytë për t’i mashtruar familjarët, një 20-vjeçar nga fshati Nakoc i Drenasit u zbulua nga autoritetet dhe u arrestua të enjten mbrëma.
“Fillimisht rasti u raportua si rrëmbim, ku menjëherë prokurori kujdestar, në koordinim me policinë, ka vepruar duke e lokalizuar të dyshuarin, nga i cili e kanë kuptuar se gjithçka është inskenim dhe nuk ka të bëjë me kidnapim”, tha Laureta Ulaj, zëdhënëse e Prokurorisë Themelore të Prishtinës.
I dyshuari me inicialet A.G., që punon si berber në Drenas, kishte provuar që kidnapimin e rrejshëm ta bëjë sa më bindës për familjarët.
“Ai u ka dërguar video dhe foto të tij familjarëve, duke kërkuar vlerën prej 3 mijë eurosh”, ka sqaruar Ulaj.
Vetëm pak javë më parë i dyshuari e kishte bërë edhe një kësi mashtrimi.
Por, zëdhënësja e prokurorisë thotë se rastin e parë familjarët e kanë kaluar në heshtje, duke mos e raportuar në polici.
Sipas Klan Kosova, i riu e ka arsyetuar inskenimin me arsyetimin se u ka para borxh disa personave. Por, kjo nuk u mohua as pohua nga familjarët.
Babai i tij tha nuk ka çka të flasë për rastin, meqë çështjen ia ka besuar drejtësisë.
