Në moshën 15-vjeçare, drejtimi i një automjeti është i ndaluar. Por kjo nuk e ka penguar një adoleshent, që të marrë timonin e një “Alfa Romeo” me në bord disa të mitur të tjerë.
Kjo ka rezultuar fatale për një prej pasagjerëve, pasi automjeti ka dalë nga rruga në Plirëz të Poliçanit. Tre personat e tjerë në bordin e automjeti janë plagosur.
“Në rrugën rurale të fshatit Plirëz, Poliçan shtetasi F.Z., 15 vjeç, duke drejtuar mjetin tip ‘Alfa Romeo’, ka humbur kontrollin mbi mjetin dhe për pasojë mjeti ka dalë nga rruga. Si pasojë ka humbur jetën shtetasi A.Z (pasagjerë në mjet) rreth 15 vjeç si dhe janë dëmtuar shtetasi F.Z (drejtues mjeti), dhe dy shtetase të tjera të mitura që ndodheshin në mjet”, njoftoi policia.
Të dëmtuarit janë transportuar në spital dhe ndodhen nën kujdesin e mjekëve, ndërsa grupi hetimor po punon për përcaktimin e shkaqeve të aksidentit.